ഞങ്ങൾ മറവിക്കാർ, ഓർമയില്ലാത്തവർ,

ജീവിതം മറന്നു പോയവർ,

തലച്ചോർ, ഞരമ്പുകൾ മരവിച്ചവർ, ചിലപ്പോൾ മരിച്ചവർ,

ഞങ്ങൾക്ക് ജീവിതവും മരണവും ഒരേ പോലെ.

ഞങ്ങൾ അനന്തമായ യാത്രയിലാണ്, ജനിച്ച വീട് ഓർമയില്ല, അച്ഛനമ്മമാരെ ഓർമയില്ല, സഹോദരങ്ങളെ,

കളിക്കൂട്ടുകാരെ ഓർമയില്ല.

പഠിച്ച സ്കൂൾ, കോളേജ് ഓർമയില്ല, എവിടെ പഠിച്ചു, പഠിച്ചോ, ഇല്ലയോ എന്നും ഓർമയില്ല. കൂട്ടുകാർ / കൂട്ടുകാരികൾ ഓർമയേയില്ല.

എവിടൊക്കെ യാത്ര ചെയ്തൂ , എതൊക്കെ രാജ്യങ്ങൾ കണ്ടൂ, എവെറെസ്റ്റിൽ കയറിയോ, ഗംഗയിൽ കുളിച്ചോ, താജ്മഹൽ കണ്ടോ, കപ്പലിൽ വിമാനത്തിൽ കയറിയോ,

ഇല്ല, ഒന്നും ഓർമയില്ല.

പതിയെവിടെ? പത്നി എവിടെ?മക്കളെവിടെ, കൊച്ചുമക്കളെവിടെ? കുടുംബമെവിടെ? ഓർമയില്ല.

കുളിച്ചോ, ഭക്ഷണം കഴിച്ചോ, ചായ കുടിച്ചോ, ടോയ്‌ലെറ്റിൽ പോയോ, ഓർമയില്ല.

അച്ചാ, അമ്മേ എന്ന് വിളിച്ച് മാലാഖകൾ പുഞ്ചിരിയുമായി ചുറ്റിലും പറക്കുന്നുണ്ടോ? സ്വപ്നമാണോ, ഭ്രാന്താണോ?

ഒരു കാര്യം മാത്രം ഓർമ വരുന്നു, അമ്മയുടെ വയറ്റിൽ ചുരുണ്ടു കിടന്നു മയങ്ങിയും ഉറങ്ങിയും കഴിഞ്ഞ കാലം,

ലോകം കാണാൻ കാത്തിരുന്ന കാലം.

ഇപ്പോഴും അതേ പോലെ കാത്തിരിക്കുന്നു, ഭാവി അറിയാതെ.

ഞങ്ങൾ മറവിക്കാർ, ഓർമയില്ലാത്തവർ, ജീവിതവും മരണവും തമ്മിൽ വ്യത്യാസമില്ലാത്തവർ.

ഞങ്ങൾ എല്ലാം മറന്നിരിക്കുന്നു, ഓർമ്മകൾക്കപ്പുറത്തേക്ക് കടന്നിരിക്കുന്നു.

അതേ, നിങ്ങളും ഞങ്ങളെ മറന്നേക്കൂ. പുഞ്ചിരിച്ചു കൊണ്ട് യാത്രയാക്കൂ!

വി എ എൻ 28.04.2024

രണ്ടു കൊല്ലം മുമ്പ് റേഷൻ കാർഡ് പുതുക്കിയപ്പോൾ ഞാൻ ഗൃഹ നായകനായിരുന്നത് മാറി എന്റെ ഭാര്യ ( പങ്കജം ) ഗൃഹനായികയായാണ് ലഭിച്ചത്. നല്ല സന്തോഷവും അഭിമാനവും തോന്നി. പണ്ടും ഇപ്പോഴും എന്റെ വീട്ടിലെ ഗൃഹനായിക അവർ തന്നെയാണ്. കേരള സർക്കാരിന്റെ നല്ല തീരുമാനം. സ്ത്രീ ശാക്തീകരണത്തിന്റെ ഒരു പടി കൂടി.

അപ്പോഴേ എന്റെ മനസ്സിൽ ഉയർന്ന് വന്ന ഒരു കാര്യമുണ്ട്. കുട്ടികൾക്ക് പേരിടുമ്പോൾ മിക്കവാറും അവരുടെ അച്ഛന്റെ പേർ അതിന്റെ കൂടെ ഉണ്ടാവും. എന്റെ മക്കളുടെ കാര്യം തന്നെ എടുക്കാം. എന്റെ പേർ കൂട്ടിചേർത്ത് ഷാജി നാരായണൻ, മിനി നാരായണൻ എന്നാണ് പേരിട്ടത്. ഇപ്പോൾ എനിക്ക് തോന്നുന്നത് പേർ നൽകേണ്ടിയിരുന്നത് ഷാജി പങ്കജം, മിനി പങ്കജം എന്നാണ്. ഇപ്പോൾ പറഞ്ഞിട്ട് കാര്യമില്ലല്ലോ. അമ്മയുടെയും അച്ഛന്റെയും പേരുകളും, അതേപോലെ അമ്മയുടെ പേര് മാത്രവുമായി നാമകരണം ലഭിച്ച ചിലരുടെ വിവരം എനിക്ക് അറിയാം. അവരെ അഭിനന്ദിക്കുന്നു.

അമ്മമാരുടെ പേർ കൂട്ടിച്ചേർക്കണമെന്ന് പറയുന്നതിലെ ന്യായങ്ങൾ എന്തൊക്കെയാണെന്ന് പരിശോധിക്കാം. ഏറ്റവും പ്രധാനപ്പെട്ടത് കുഞ്ഞിനെ പ്രസവിക്കുന്നത് അമ്മയാണ് എന്നുള്ളതാണ്. രണ്ടാമത്തേത് ശൈശവ കാലത്തെങ്കിലും കുട്ടിയുടെ ജീവിതത്തിൽ ഏറ്റവുമധികം ബന്ധപ്പെടുന്നത് അമ്മയാണ്. മുലപ്പാൽ കൊടുത്തും, ഭക്ഷണം കൊടുത്തും, താരാട്ട് പാട്ട് പാടി ഉറക്കിയും.. എല്ലാം ചെയ്യുന്നത് അമ്മ തന്നെ. ഇനിയും പറയാൻ കാര്യങ്ങൾ ഉണ്ടാവും.

മുൻപായിരുന്നെങ്കിൽ വിവാഹം കഴിച്ചാൽ പല സ്ത്രീകളും ഭർത്താവിന്റെ പേർ കൂട്ടിച്ചേർക്കാറുണ്ട്. പഠനവും, ഉപരി പഠനവും കഴിഞ്ഞു ജോലിയും ലഭിച്ച ശേഷം വിവാഹം കഴിക്കുന്ന ഈ കാലത്ത് ഭർത്താവിന്റെ പേർ കൂട്ടിച്ചേർക്കുന്നത് മിക്കവാറും ഇല്ലാതായിരിക്കുന്നു. ഐഡന്റിറ്റി കാർഡും, ആധാറും, പാസ്സ്പോർട്ടും തുടങ്ങി പല രേഖക ളിലുമുള്ള പേരിനോട് ഭർത്താവിന്റെ പേർ കൂടി ചേർത്താൽ ഉണ്ടാകുന്ന വിഷമതകൾ തന്നെ കാരണം. മറ്റൊരു കാര്യം കൂടി ഉണ്ട്. വിവാഹ മോചനവും രണ്ടാം വിവാഹവും വര്ധിക്കുന്ന ഇന്നത്തെ കാലത്ത് ഭർത്താവിന്റെ പേർ കൂട്ടിച്ചേർക്കുന്നത് കൂടുതൽ പ്രശ്നങ്ങൾ സൃഷ്ടിക്കും.

അപ്പോൾ അച്ഛന്റെയോ ഭർത്താവിന്റെയോ പേർ കൂട്ടിച്ചേർക്കുന്നതിന്നു പകരം ആദ്യം മുതലേയുള്ള, കൂട്ടിച്ചേർത്ത അമ്മയുടെ പേർ തന്നെ പെൺകുട്ടികൾക്ക് ഉത്തമം. അതല്ല, രണ്ടും വേണ്ട എന്ന അഭിപ്രായവും ഉണ്ട്. പലരുടെയും പേരുകളിൽ അച്ഛന്റെയും അമ്മയുടെയും പേർ ഇല്ലല്ലോ.

ഇനി ആൺകുട്ടികളുടേതോ? അതും അമ്മയുടെ പേർ കൂട്ടിച്ചേർക്കുന്നതാണ് ശരി എന്നാണ് എന്റെ അഭിപ്രായം. മകൻ ആയാലും മകൾ ആയാലും അമ്മയോട് തന്നെയാണല്ലോ കൂടുതൽ അടുപ്പം. ഇവിടെയും രണ്ടു പേരുടെയും പേർ കൂട്ടി ചേർക്കാതെയും ഇരിക്കാം.

വ്യത്യസ്ത അഭിപ്രായങ്ങൾ ഉണ്ടാവും. ചർച്ചകളും നല്ലത് തന്നെ.

വി എ എൻ 27.04.2024

ചിന്ത, ദേശാഭിമാനി വാരികപ്പതിപ്പ് കൈരളി, വയോജന വാർത്ത, പെന്ഷണർ ലിങ്ക്, BSNL ക്രൂസെഡർ തുടങ്ങി പലതിലും അഭിപ്രായങ്ങൾ വരികയുണ്ടായി. പല സഖാക്കളും കത്തിലൂടെയും നേരിട്ടും അഭിനന്ദനം അറിയിക്കുകയും ചെയ്തു. സുഹൃത്തുക്കളും പ്രത്യേകിച്ച് വിവിധ സംഘടനാ പ്രവർത്തകരും പുസ്തക വില്പനയിൽ കാര്യമായി സഹായിച്ചു. സ. പി വി സി മാത്രം ഏകദേശം 1000 ത്തോളം പേരുടെ മേൽവിലാസം അയച്ചു തരികയും അവർക്കു പുസ്തകങ്ങൾ വി പി പി യായി അയച്ചു കൊടുക്കുകയും ചെയ്തു.

പ്രകാശന ദിവസം 25,000 രൂപ മുഖ്യമന്ത്രിയുടെ റിലീഫ് ഫണ്ടിലേക്ക് പുസ്തക വരുമാനത്തിൽ നിന്നു മുൻകൂറായി സംഭാവന നൽകുകയുണ്ടായി. രണ്ടാം എഡിഷൻ പ്രസിദ്ധീകരിച്ചപ്പോൾ അതിന്നു മുൻകൈയെടുത്ത AIBDPA സംസ്ഥാന കമ്മിറ്റിക്കും മുൻകൂറായി 25,000 രൂപ സംഭാവന നൽകി.

പുസ്തകത്തിന്റെ ഇംഗ്ലീഷ് പതിപ്പ് ‘ My Life, Struggles ‘ ഏകദേശം അതേ സമയം ബാംഗ്ലൂരിൽ വെച്ച് 500 ൽ പരം ടെലികോം സഖാക്കളുടെ യോഗത്തിൽ വെച്ച് AIIEA യുടെ സമുന്നത നേതാവ് സ. അമാനുള്ള ഖാൻ പ്രകാശനം ചെയ്തു. BSNLEU കർണാടക സർക്കിൾ സെക്രട്ടറി സ. എഛ് ഡി സുദർശൻ ആണ് അതിന്നു മുൻകൈ എടുത്തത്. 350 ലേറെ കോപ്പികൾ അവിടെ വെച്ച് തന്നെ മേടിക്കപ്പെട്ടു. തുടർന്നു AIBDPA, NCCPA അഖിലേന്ത്യ സമ്മേളനങ്ങളിൽ വെച്ച് മിക്കവാറും ബാക്കി കോപ്പികളും ചിലവായി.

മലയാളം പുസ്തകത്തിന്റെ 100 ൽ പരം കോപ്പികൾ കയ്യിലുണ്ട്. ആവശ്യക്കാർ അറിയിച്ചാൽ വി പി പി ആയി അയക്കാം. പുസ്തക വില 250 രൂപ. വില്പന വില 200 രൂപ. വി പി പി ചാർജ് അടക്കം 250 രൂപക്ക് അയക്കും.

പുസ്തക പ്രസാധനവുമായും പുസ്തകം മേടിച്ചും അഭിപ്രായം അറിയിച്ചും സഹകരിച്ച എല്ലാവർക്കും നന്ദി!

വി എ എൻ 27.04.2024 Mobile : 9868231431

ചിന്ത, ദേശാഭിമാനി വാരികപ്പതിപ്പ് കൈരളി, വയോജന വാർത്ത, പെന്ഷണർ ലിങ്ക്, BSNL ക്രൂസെഡർ തുടങ്ങി പലതിലും അഭിപ്രായങ്ങൾ വരികയുണ്ടായി. പല സഖാക്കളും കത്തിലൂടെയും നേരിട്ടും അഭിനന്ദനം അറിയിക്കുകയും ചെയ്തു. സുഹൃത്തുക്കളും പ്രത്യേകിച്ച് വിവിധ സംഘടനാ പ്രവർത്തകരും പുസ്തക വില്പനയിൽ കാര്യമായി സഹായിച്ചു. സ. പി വി സി മാത്രം ഏകദേശം 1000 ത്തോളം പേരുടെ മേൽവിലാസം അയച്ചു തരികയും അവർക്കു പുസ്തകങ്ങൾ വി പി പി യായി അയച്ചു കൊടുക്കുകയും ചെയ്തു.

പ്രകാശന ദിവസം 25,000 രൂപ മുഖ്യമന്ത്രിയുടെ റിലീഫ് ഫണ്ടിലേക്ക് പുസ്തക വരുമാനത്തിൽ നിന്നു മുൻകൂറായി സംഭാവന നൽകുകയുണ്ടായി. രണ്ടാം എഡിഷൻ പ്രസിദ്ധീകരിച്ചപ്പോൾ അതിന്നു മുൻകൈയെടുത്ത AIBDPA സംസ്ഥാന കമ്മിറ്റിക്കും മുൻകൂറായി 25,000 രൂപ സംഭാവന നൽകി.

പുസ്തകത്തിന്റെ ഇംഗ്ലീഷ് പതിപ്പ് ‘ My Life, Struggles ‘ ഏകദേശം അതേ സമയം ബാംഗ്ലൂരിൽ വെച്ച് 500 ൽ പരം ടെലികോം സഖാക്കളുടെ യോഗത്തിൽ വെച്ച് AIIEA യുടെ സമുന്നത നേതാവ് സ. അമാനുള്ള ഖാൻ പ്രകാശനം ചെയ്തു. BSNLEU കർണാടക സർക്കിൾ സെക്രട്ടറി സ. എഛ് ഡി സുദർശൻ ആണ് അതിന്നു മുൻകൈ എടുത്തത്. 350 ലേറെ കോപ്പികൾ അവിടെ വെച്ച് തന്നെ മേടിക്കപ്പെട്ടു. തുടർന്നു AIBDPA, NCCPA അഖിലേന്ത്യ സമ്മേളനങ്ങളിൽ വെച്ച് മിക്കവാറും ബാക്കി കോപ്പികളും ചിലവായി.

മലയാളം പുസ്തകത്തിന്റെ 100 ൽ പരം കോപ്പികൾ കയ്യിലുണ്ട്. ആവശ്യക്കാർ അറിയിച്ചാൽ വി പി പി ആയി അയക്കാം. പുസ്തക വില 250 രൂപ. വില്പന വില 200 രൂപ. വി പി പി ചാർജ് അടക്കം 250 രൂപക്ക് അയക്കും.

പുസ്തക പ്രസാധനവുമായും പുസ്തകം മേടിച്ചും അഭിപ്രായം അറിയിച്ചും സഹകരിച്ച എല്ലാവർക്കും നന്ദി!

വി എ എൻ 27.04.2024 Mobile : 9868231431